Vista do Pico Sacro dende Sergude, a parroquia máis extensa e máis poboada de Boqueixón É a parroquia máis extensa, con 9,4 Km2., e habitada do concello (893 hab.). Localízase na ladeira nordeste do Pico Sacro formando un pequeno val arredor do río Pereiro. As súas fértiles terras adícanse a prado e á produción agrícola. Ben comunicada coa capital de Galicia a través da N-525 e pola AC 960 Santiago-Vila de Cruces. Consta de doce entidades de poboación: Deseiro de Abaixo, Deseiro de Arriba, A Eirexe, Gándara, Lamas, Mareque, Noenlle, Pumares, Quián, Rodiño Grande, Rodiño Pequeno e Vilar. Igrexa Parroquial de San Breixo de Sergude
Igrexa Parroquial de San Breixo de Sergude
As primeiras referencias documentais sobre este templo datan do ano 1632, nas que xa se describe o seu estado ruinoso. Isto motiva a súa reconstrución, que se levará a cabo na primeira metade do século XVIII. Iníciase coa capela maior en 1701, reformando o anterior presbiterio en paredes, bóvedas e caleados. Dende 1729 a 1750 levántase o novo corpo, que adopta forma de cruz latina, capelas laterais, capela maior e, por último, a torre coas técnicas, materiais e proporcións do Barroco. No seu interior apenas presenta decoración. Chaman a atención as voluminosas placas xunto ás molduras do entaboamento que o recorren, e que dan ao edificio unha plasticidade e movemento típico do estilo imperante neste momento histórico. Non obstante, a fachada e a torre responden a criterios historicistas cun deseño austero, sinxelo e sen ornamentos.
· Retablos: Retablo Maior, Retablo do Santo Cristo e Retablo de Ánimas.
· Imaxinaría: Nosa Señora do Rosario, San Ramón, San Antonio de Padua, A Sagrada Familia, San Gregorio, San Breixo, Crucificado, San Roque, San Antonio Abad, Inmaculada Concepción, Sagrado Corazón de Xesús, San Bieito e San Miguel. Capela de San Bieito
Capela de San Bieito, en Rodiño. Ao seu carón celébrase cada segundo domingo de mes unha feira-mercado Atopamos esta capela, edificada na segunda metade do século XIX, integrada nunha carballeira de gran beleza, a carón de onde se celebra a Feira Mercado de Rodiño os segundos domingos de cada mes. Presenta planta de salón, destacando a súa sinxeleza, xa que carece de ornamentación tanto no seu interior como no exterior, con muros desprovistos de decoración e lisos propios da arquitectura historicista.
· Imaxinaría: San Bieito. Cruceiro Parroquial
Situado no campo da festa, ten plataforma cuadrangular e pedestal cúbico con remates en chafráns. Varal octogonal, capitel cadrado moldurado e cruz romboide con remates floreados con motivo circular de Corpus. Todo en granito.
Cruceiro de Rodiño
No lugar de Rodiño Grande, no campo da festa de San Bieito atopamos este cruceiro de granito con plataforma cuadrangular e pedestal cúbico con remates en chafráns. Varal octogonal, capitel cuadrangular moi moldurado e cruz romboide con remates floreados e motivo circular de Corpus no centro dos brazos.
Cruceiro de Quián
Cruceiro de estilo rústico. Entre pedras que substitúen á plataforma, xorde o varal octogonal con pequeno pedestal. Sen capitel e cruz octogonal con remates floreados.
Pazo de Quián
Antiga residencia da familia dos Campuzano, está ocupado hoxe polo Centro de Formación e Experimentación Agraria, quedando en pé un edificio con torre con ameas e unha capela unida de estilo neoclásico e planta rectangular. Ponte de Busacos
Ponte romana situada no lugar de Gándara que divide e da paso, respectivamente, aos concellos de Boqueixón e de Vedra. Consta de dous arcos, un de medio punto e outro apuntado. Por el discurre unha das máis importantes rutas de peregrinacións a Compostela: A Ruta da Prata. Local Sociocultural de Sergude
| Pazo de Quián, actualmente sede do Centro de Formación e Experimentación Agraria de Galicia
| Detalle do campanario da igrexa parroquial de Sergude
| |
|
Concello de Boqueixón
