OBRAS DO AVE: CONSTRÚEN UN VERTEDOIRO ENRIBA DO RÍO QUE ABASTECE DE AUGA A BOQUEIXÓN E VEDRA
O Concello de Boqueixón denunciou a Dragados, empresa adxudicataria das
obras do AVE ao seu paso por este municipio, ante Augas de Galicia e o SEPRONA da
Garda Civil por construír un vertedoiro de terras procedentes das escavacións
da vía férrea enriba dun regato que abastece ó servizo municipal de
distribución de auga potable.
VECIÑOS DE BOQUEIXÓN VISITAN EXPO ZARAGOZA NUNHA VIAXE ORGANIZADA POLO CONCELLO
Un grupo de 50 veciños de Boqueixón ven de rematar unha estadía de
cinco días en Aragón, onde o prato principal da viaxe foi a visita que
realizaron a Expo Zaragoza 2008. Esta iniciativa foi organizada directamente
dende o concello e supuxo un custe para cada viaxeiro de 65 euros, onde se
incluían os traslados, o aloxamento e o almorzo. Ademais da Expo, os boqueixaneses tamén tiveron a oportunidade de
visitar a capital aragonesa, con paradas obrigatorias na Basílica da Virxe do
Pilar ou o Palacio da Alfajería, así como o Mosteiro de Pedra ou a vila de
Calatayud.
VECIÑOS DE RODIÑO, FARTOS DOS CONTÍNUOS ACCIDENTES QUE SE PRODUCEN EN DÚAS CURVAS DA ESTRADA AC960
Os veciños de Rodiño, na boqueixanesa parroquia de Sergude, solicitaron
a mediación do Concello a fin de conseguir da consellería de Política
Territorial unha solución que evite os múltiples accidentes que se veñen
producindo nas dúas curvas que atravesan esta localidade, na estrada AC960 de A
Susana a Ponte Ledesma. Os mesmos veciños din que afortunadamente ata o de
agora os accidentes non tiveron consecuencias persoais, aínda que si danos
materiais cuantiosos.
OS GRUPOS DE NENOS E MAIORES DE BOQUEIXÓN CLAUSURAN AS ACTIVIDADES EN PISCINA CUBERTA
O concello de Boqueixón clausurou as actividades deportivas en piscinas cubertas, tanto para maiores como para nenos, que se viñan celebrando durante outono e inverno.
O cumio do Pico Sacro está sendo completamente desbrozado, a fin de retirar a maleza que dificulta o paseo polos sendeiros que bordean o monte, impide a correcta visualización dos restos da antiga fortaleza e mesmo entorpece a contemplación dunha das paisaxes máis fermosas de Galicia. Os traballos, que se desenvolverán durante os vindeiros dous meses, teñen como obxecto limpar de maleza os arredores do cumio do monte, nunha superficie de 46.500 metros cadrados. As especies afectadas son, fundamentalmente, silvas, toxos e xestas. A forte pendiente e a protección arqueolóxica do monte fan que sexa necesario realizar a maioría do traballo de forma manual, tendo que empregar materiais de escalada e seguridade en varias zonas.
O Concello proponlle á Xunta máis medios e recursos contra os incendios forestais
O director xeral de Montes, Alberte Blanco, reuniuse co alcalde e tenente de alcalde de Boqueixón para tratar de mellorar as prestacións forestais dun concello coma o noso, cunha gran masa arbórea. Trátase de poñer as bases de actuación e mellorar a prevención, a fin de evitar que se repita a vaga de incendios que tivo lugar en agosto de 2006.
A asociación Chisem desenvolve un Programa de habilidades sociais no CPI O Forte
Durante os meses de Abril e Maio, desenvólvese no C.P.I Antonio Orza Couto (Boqueixón), o Programa de Habilidades Sociais para alumnos/as de 6º de E.P.O, levado a cabo polos/as profesionais da Asociación para a Prevención e Intervención Psicolóxica Chisem. A posta en práctica deste Programa é gracias á colaboración da Obra Social Fundación ”la Caixa” e á coordinación co Centro Educativo.
O CONCELLO DE BOQUEIXON BECA O TRANSPORTE ESCOLAR DE 107 ESTUDANTES EN SANTIAGO
Un total de cento sete xóvenes de Boqueixón recolleron as becas municipais de transporte escolar correspondentes ao curso 2007-2008. Estas axudas están pensadas para sufragar parte do gasto que supón os billetes de autobús nos que viaxan a diario a maioría dos estudantes de Boqueixón en Santiago.Cada un dos estudantes becados recibiron unha axuda individual de entre 70 e 177 euros. A cantidade varía segundo as diferentes tarifas de autobús que teñen que pagar os usuarios, e que á súa vez dependen da maior ou menor distancia das paradas de Boqueixón a Santiago. En total, o concello destinou este ano 12.000 euros para becas de transporte.En cursos anteriores o concello de Boqueixón axudaba aos estudantes en Santiago con un carné de transporte escolar que rebaixaba nun 50% o prezo do billete. Este ano tomouse a decisión de modificar o sistema e ofrecer becas en efectivo, a fin de que os alumnos tamén se poidan acoller ó novo sistema de billete único que debe poñer en marcha o transporte metropolitano da comarca de Compostela.
BOQUEIXÓN PÍDELLE A MEDIOAMBIENTE 612.000 EUROS PARA COMPLETAR O SANEAMENTO DE SERGUDE E LESTEDO
O alcalde de Boqueixón, Adolfo Gacio, reuniuse co conselleiro de Medioambiente, Manuel Vázquez, para solicitar da Xunta o financiamento das obras de ampliación dos saneamentos de Sergude e Lestedo, as parroquias con máis poboación do municipio. O proxecto, valorado en 612.000 euros, permitiría completar este servizo público no cen por cen das dúas parroquias, que xa contan na actualidade con saneamentos parciais.
Concello de Boqueixón
